«Алматы» ӘКК» Алматы қаласы әкімдігінің күрделі құрылыс кәсіпорны» ЖШС-мен бірлесіп 280 тұрғынды қоныстандырды. Бұрын қаланың Әуезов, Алатау, Бостандық, Жетісу және Медеу аудандарында пайдалану мерзімі өткен 10 үйде тұрған 70 отбасы заманауи тұрғын үй кешендерінен жайлы жаңа пәтерлердің кілтін алды.

Биыл жыл соңына дейін Алматыда 54 ескі үйдің тағы 2 180 тұрғынын жаңа үймен қамтамасыз ету жоспарланып отыр.

Жаңарту бағдарламасы аясында адамдардың өміріне қауіп төндіретін жарамсыз әрі мерзімі өткен тозығы жеткен үйлер бұзылады. Олардың орнында спорт алаңдары, паркинг және маңызды әлеуметтік нысандары бар заманауи тұрғын үй кешендері салынуда. Бағдарламаның шартына сәйкес, ескі тұрғын үй иелері жаңа үйден бірдей пәтер алады. Сонымен қатар, жаңа пәтер орта есеппен 10 шаршы метрге көп. Жаңа пәтер иелеріне қосымша шаршы метр үшін қосымша ақы төлеудің қажеті жоқ. Пәтерлер таза әрлеумен беріледі. Үйлерге интернет тартылды, өртке қарсы дабыл орнатылды, сантехника мен фаянс, газ немесе электр плитасы қарастырылған.

Құрылыс кезінде тұрғындарға тегін уақытша тұрғын үй беріледі. Сондай-ақ, тұрғындардың күрделі құрылыс кәсіпорнының тұрғын үй қорынан дайын үйге тұрақты тұруға көшу мүмкіндігі бар.

«Тұрғын үй қорын жаңарту бағдарламасы кең танылып, қала тұрғындарының сеніміне ие болды. Алматылықтар жаңа үйлерге қуана көшуде, бұл олардың тұрғын үй жағдайын, сондай-ақ қаланың келбетін жақсартуға мүмкіндік береді. Бүгінгі таңда 2030 жылға дейін жаңарту бағдарламасының жобасы әзірленді. Онда ескі үйлердің иелері, инвесторлар мен уәкілетті ұйымдар арасындағы қарым-қатынасты реттеу сияқты жаңа тетіктер көзделеді, ескі пәтерді беру тәртібі көрсетіледі, 2023 жылы қабылданған қаланың жаңа бас жоспары ескеріледі. Осы шаралардың барлығы тұрғындарды ескі үйлерден жайлы пәтерлерге көшіру қарқынын жеделдетуге мүмкіндік береді», - деді «Алматы қаласы әкімдігінің күрделі құрылыс кәсіпорны» Басқарма төрағасының орынбасары Алтынбек Нұратұлы.

Жаңа жаңғырту бағдарламасының жобасын мәслихат депутаттары, қоғамдық кеңес, «Атамекен» ҰКП-мен және бизнес қоғамдастық өкілдері алдын ала талқылаған.

Ақпарат көзі: Алматы қаласы әкімдігінің баспасөз қызметі