Ұлттық «Жайлы мектеп» жобасы аясында биыл 4 мың орынға арналған 2 жаңа мектептің құрылысы аяқталады: мамыр айында – Розыбакиев көшесінде, тамыз айында – Егізбаев көшесінде.

«Биыл қыркүйек айында №73 мектеп ғимаратын қайта жаңарту және 450 орынға арналған қосымша ғимарат құрылысын аяқтау жоспарланған. 2025 жылдың соңына дейін №10 мектеп-интернаты мен №189, №191 мектептері сейсмикалық тұрғыда нығайтылып, күрделі жөндеу жұмыстары аяқталады, сондай-ақ, Республикалық физика-математика мектебінің ғимараты реконструкциялаудан өтеді. Ал №60 мектептің реконструкциясы осы жылдың сәуір айында басталып, 2026 жылдың қыркүйегінде аяқталады», – деді Ерболат Досаев.

Мектепке дейінгі білім беру мекемелерінің желісін кеңейту жұмыстары да қарқынды жүргізілуде. 2025 жылдың наурызына дейін Орбита-3 шағын ауданындағы бұрынғы балалар үйінің екі ғимараты қайта жаңғыртылады. Оның біреуі 240 орындық балабақшаға, ал екіншісі ерекше білім беру қажеттілігі бар балаларға арналған 100 орындық түзету балабақшасына айналады.

Сонымен қатар, №81, №87 және №137 балабақшаларында сейсмикалық нығайтылып, күрделі жөндеу жұмыстары жүргізіліп жатыр, олар 2025 жылдың соңында аяқталады.

Айта кетейік, 2024 жылы Бостандық ауданында 801 балаға арналған 15 жеке балабақша ашылды. «Балалардың қосымша білім алуы мен дамуына қолайлы жағдай жасау мақсатында бұған дейін Вахтангов көшесінде орналасқан 1964 жылы салынған Оқушылар үйінің ескі ғимаратын бұзу туралы шешім қабылданған болатын. Оның орнына барлық заманауи стандартқа сай жаңа ғимарат салынды. Сәуір айында біз балаларымыз үшін ашуды жоспарлап отырмыз», – деді Ерболат Досаев.

Қазіргі заманға сай екі қабатты ғимаратта 12 шығармашылық кабинет, пікірталас клубы, бағдарламалау, 3D модельдеу, құрылымдау, фото және бейнемонтаж үйірмелері ашылады. Оқушылар үйінде аптасына 5-17 жас аралығындағы 2 мың бала білім ала алады.

Айта кетейік, бұған дейін Алматының Алмалы ауданында да жаңа заманауи Оқушылар үйі салынған болатын. Онда күн сайын 400 бала білім алады.