Басқосуды ашқан қала басшысы мектептер мен балабақшаларды уақытылы әрі сапалы дайындаудың басты міндет екенін айтты. 

Кеңесте қалалық білім басқармасының басшысы Сайран Сайфеденов баяндама жасады. Оның айтуынша, Алматыда 1 696 білім беру ұйымы жұмыс істейді. Оның ішінде 1 050-і – балабақша, 348-і – мектеп, онда 565 мыңнан астам бала білім алып жатыр. 

Қазір «Келешек мектептері» ұлттық жобасы аясында 34,2 мың оқушыға арналған 20 жаңа мектептің құрылысы жүріп жатыр. 1 қыркүйекке дейін 8 жаңа мектеп ашылуға тиіс. Тағы алтауы тамыз айында аяқталады. Бұған қоса, жергілікті бюджет есебінен 550 орындық бір мектеп салынып жатыр. 15 мектепке күрделі жөндеу жүргізіліп жатса, алтауы сейсмокүшейту арқылы қайта жаңартылып, 4 мектепте қосымша ғимарат тұрғызылып жатыр. 

Бірінші және оныншы сыныптарға қабылдау жоспарлы түрде жүріп жатырү Жаңа оқу жылында 26 099 бүлдіршін алғаш рет алғаш рет мектеп табалдырығын аттамақ. Бүгінде олардың 18 мыңнан астамы мектепке тіркеліп үлгерді. 9-сыныпты тәмамдаған 17 840 түлек 10-сыныпта оқуын жалғастырады. Бұл білімге деген сұраныстың жоғары екенін көрсететін оң көрсеткіш.

Қауіпсіздік мәселесі де назардан тыс қалмады. Қала мектептерінде 21 мыңнан аса бейнебақылау камерасы, дабыл түймелері, кіруді бақылау жүйелері және өрт дабылдары орнатылған.

«Оқу орындарындағы қауіпсіздік ерекше бақылауда», – деді әкім.

Қосымша түрде маман даярлау, колледждерді цифрландыру және жаңғырту мәселесі қаралды. Біліктілікті арттыру бағдарламасы аясында 2025 жылы 5 мыңнан астам педагог оқытудан өтті, оның ішінде 400-ден астамы шетелде білім алған. Тағылымдамалар нәтижесінде 117 жаңа білім беру бағдарламасы мен жобасы енгізілді. Техникалық және кәсіптік білім беру ұйымдарында 85 мыңнан астам студент оқиды, олардың жартысынан астамы мемлекеттік тапсырыс бойынша білім алып жатыр. Колледждерді жаңғырту аясында жаңа корпустардың құрылысы, күрделі жөндеу және зертханаларды жабдықтау көзделген.

Жиын соңында Алматы әкімі Білім басқармасына барлық жұмысқа бақылауды күшейтуді және белгіленген кестенің қатаң сақталуын тапсырды.

«Әрбір нысан, мейлі ол жаңадан салынған мектеп болмаса жөндеуден өткен ғимарат болса да, уақытында әрі сапалы түрде тапсырылуы керек. Кешігу мен сылтауға жол жоқ. Біздің басты міндетіміз оқушылар мен мұғалімдер үшін жаңа оқу жылын лайықты деңгейде ұйымдастыру», – деді Дархан Сатыбалды.